Èl Presepio dè san Roch
Ah! chè bèla troàda stàn per Nedàl,
gli “amici dèl presepio” e a chi gh’a piàs a fàl,
i l’hà tràt èn pé propès èn mès ala césa dè san Roch.
Pensom a che roba fà, isé a bèl bèlaze a toch a toch,
ensèma vé le idee, vedòm come èl vé,
èl sif o no che l’Anno Santo, l’è che didré?
Èl “Giubileo” l’è la bèla ocasiù
dè fà un bèl sègn de gran deosiù per töta la populasiù.
Èl Papa èl gh’a lanciàt l’idea:”Pellegrini di speranza”,
l’è la virtù chè sa pöl mia, mai fà senza.
‘Ndà al presepio èl sarà un “Cammino”,
vèrs nost Signur chè nàs:” Gesù Bambino”.
Apó i s-cècc, coi maestri e prufesùr dè lè scöle, èn cumpagnia,
i farà edèr i sò laurà söl fiöl dè Giuseppe e Maria.
Èl 2025 èl gh’a dè esèr un àn dè pace e vulìs bé,
dè ‘mparà ha fàl töcc ensèma dé per dé,
se no l’Anno Santo èl pasa isé come töcc i àgn
bé o mal come i-oter sensa fa tàncc dàgn.
San Roch, varda zo bé, Te òm dè “misericordia”,
fà che nel mond gh’a sapès mia pö “discordia”,
ma gh’hóm dè recuperà: la fede, la speranza e la carità,
le virtù chè ‘na ocor sèmpèr, come èl pà.
Èl presepio èn san Roch, èl siès un augurio per la comunità,
dè pasà ‘n bu Nedàl e un “Anno Santo” che èl stà per ‘ncumincià!
